「中美高層戰略對話呀，要恢復雙方接觸嘅框架，你睇美國佬幾想同我傾！」
『人哋同你單次會面咋，仲要揀冰天雪地嘅阿拉斯加，擺明落你面，唔歡迎你，你仲去？』
「美國沒有資格居高臨下同中國說話，中國人不吃這一套！」
『其實有邊個自卑心發作，成日凝住人哋咩居高臨下同你講嘢？你做得啱，有隻狗吠你，你會覺得隻狗居高臨下同你講講嘢？個重點係你有冇做錯？人哋鬧你有冇道理？人哋鬧得你大聲，係因為你做錯呀，唔係因為你哋「居高臨下」呀，反省下啦！』
「中國喺聯合國人權理事會上，指責美國唔聽中國對美國人權嘅建議，對此深表遺憾，對美國人權狀況持續惡化深表關切，指美國未能採取有力措施防控疫情，導致幾十萬人死亡，種族歧視、警察暴力，導致嚴重人權和人道主義危機」
『好心你講嘢之前，痌篤尿，照下鏡啦，美國有冇送少數族裔入集中營呀？人哋警察濫權有得投訴會撤職仲會畀人告，中國嘅警察同公安呢？更加唔好講，當初疫情爆發，人哋停止中國人入境，你嗰時講咩？屈人哋種族歧視，話人哋係法西斯；結果都係停得太遲，武肺搞死咁多人，話要追究播毒責任，又話人哋政治化，又話人哋賴人；疫情係處理唔好，賴人哋「人權差」？真係太監教人洞房，阿仔教阿爸上床，你覺得講呢啲除咗激嬲對方之外，有用咩？』
「你睇唔到幾多中國人撐政府，不斷轉載人民日報嘅文宣咩？中國人民進起來了！家下唔係1901年，美國買我哋怕啦！」
『係呀，所以美國佬驚咗你，覺得中國仲惡過納粹德國，你班友仲惡過希特拉，因此要搞新冷戰，圍堵你呀嘛，你仲去撥火，嫌人哋唔夠憎你呀？你究竟係搞外交，定係去嗌交架？其實去美國為咗乜？』
「梗係為咗說服美國佬，取消對中國制裁，叫美國認清中國實力，咪以為中國人好蝦啦！」
『人哋制裁你，係為咗制止你今日某啲行為；你愈叫得兇狠，人哋就愈憎你，就愈打算約埋班盟友，一齊圍堵你，你係咪想咁呀？』
「胡道八道！美國冇資格對中國說三道四！中國可以說不！中國人可以說不！美國已經衰落，家下係『東升西降』，好心美國佬認清現實啦！」
『啊，人哋就係認清現實，因此從此要全面封殺你，要搞新冷戰全面制止，唔畀你好似以前咁樣搵錢，你明未呀？』(未完，全文按連結，請訂閱壹週刊）
Search